Бишкек, 16.01.25. /Чолпон Жумалиева – Кабар/. Ысык-Ата районундагы жаңы түзүлгөн айыл өкмөттөргө, мэрияга жана райондук мамлекеттик администрацияга жалпысынан 11 унаа тапшырылды. Бул тууралуу Ысык-Ата районунун акими Эрмекбай Омошев унаалардын ачкычын тапшыруу аземинде билдирди.
Анын айтымында, өткөн жылы Ысык-Ата районунда административдик-аймактык реформа аягына чыгып, реформага чейин 18 айыл өкмөтү, бир шаар болсо, учурда 9 айыл өкмөт, бир облустук маанидеги Кант шаары түзүлгөн.
“Ысык-Ата району пилоттук долбоорго кирип жатат. Долбоордун негизинде район акимине тиешелүү ыйгарым укуктар берилет. Бизге бүгүнкү күндө күч структураларынан тышкары, районго тиешелүү мекеме-уюмдардын жетекчилерин дайындоо ыйгарым укуктары берилип жатат. Негизи райондук мамлекеттик администрация ар бир тийиштүү райондук мекеме-уюмдар менен иш алып барат. Функциялар так бөлүштүрүлбөгөндүктөн, айыл өкмөт же башка мекеме аткарыш керек деген учурлар болгон. Функцияларды так бөлүштүрүү максатында да райондук мамлекеттик администрацияга ыйгарым укуктар берилип жатат”, - деди Эрмекбай Омошев.
Эске салсак, бүгүн пилоттук долбоорго кирген Чүй облусунун Ысык-Ата районунун жана Ош облусунун Өзгөн районунун жергиликтүү мамлекеттик администрацияларына жана айыл өкмөттөрүнө министрлер кабинетинин төрагасы Адылбек Касымалиев 25 унаанын ачкычын тапшырды.
Пикир
Оставить комментарий