Тажикстандын кол салуусу. Бишкекте кайрымдуу жарандар гумжардам алып келүүнү улантууда

Бишкек, 20.09.22. /Кабар/. Бишкекте кайрымдуу жарандар гуманитардык жардамдарды кабыл алуу пункттарына тамак-аш, кийим-кече, гигиеналык каражаттарды жана дары-дармектерди алып келүүнү улантууда.

Бишкек мэриясынан билдиришкендей, борбор калаанын ар бир районунда Тажикстандын кол салуусунан жапа чеккен Баткендин жашоочулары үчүн азык-түлүктөр чогултулду.

Биринчи май району боюнча 612 кг ун, 428,6 кг дан азыктары, 1005,5 кг ун азыктары, 104 кг мөмө-жемиш, кийим-кече жыйналды.

Ленин району боюнча 9 тонна ун, 2,3 тонна кумшекер, дары-дармек жана буюмдар жыйналды.

Октябрь районунун тургундары 100 кг ун, 212 кг дан азыктары, 45 кг кумшекер, 487 кг ун азыктары жана жашылча-жемиш жыйнашкан.

Свердлов району боюнча 1307 кг ун, 317 кг дан азыктары, 952 кг кумшекер, 412 литр өсүмдүк майы, 80 кг туз, гигиеналык каражаттар жана кийим-кече жыйнашкан.

Ошондой эле Бишкекке келген баткендик 57 тургун White hotel, Shirin Botanik мейманканасы, медициналык академиянын жатаканасы, «Тумар», «Достук» мейманканаларына жайгаштырылган.